Bazko gaua (2)
Epixtola
( Bataioak emaiten dauku hil eta piztua den Kristoren bizia )
Jondoni Paulok Erromanoeri 6,3-11
Haurrideak,
3 Jesu Kristo baitan bataiatuak giren guziak,
haren heriotzean gira bataiatuak izan.
4 Bataioaren bidez Harekin heriotzean hilobiratuak izan gira,
Aitaren aintzari esker Kristo hilen artetik piztu den bezala,
guk ere bizi berria bizi dezagun.
5 Harena bezalako heriotzean harekin bat egin bagira,
harekin bat eginen gira harena bezalako piztean ere.
6 Badakigu , lehen ginen gizaki hura
Kristorekin gurutzean ezarria izan dela,
bekatuzko gizaki hura suntsitua izan zadin
eta bekatuaren esklabo izan ez gintezen gehiago.
7 Alabainan, hila dena, bekatutik libratua da.
8 Kristorekin hil bagira,
sinesten dugu harekin biziko ere girela.
9 Badakigu: Kristo hilen artetik piztuz geroz, ez da berriz hilen;
herioak ez du gehiago eskurik haren gainean.
10 Hil da, eta bekatuari zaio hil behin betiko.
Bizi da, eta Jainkoarentzat da bizi.
11 Berdin zuek ere: har gogoan bekatuarentzat hilak zireztela,
bainan Jainkoarentzat bizi Jesu Kristoren baitan.
Erromanoeri epixtolaren mamia hau da : nor nahi izan gaiten, Jainkoak bere graziaz salbatzen gaitu: salbamendu hori fedean onartzea aski zauku. Salbamendua kitorik ukaite horren kontrakoak izan dira eta badira orain ere, erraiten dutenak: salbamendua kitorik dugula errepikatzean bekatu egitera sustatzen duzue. Bainan Paulok ez du holakorik: ez du bekatua deuseztatzen Jainkoaren graziaren aitzakiaz; bataioaz geroz, kreatura berriak gira eta bekatuak ez du hartzerik : « Norbait Kristorena bada kreatura berri da. » (2 Ko 5,17)
Pauloren erantzuna ez da moralan oinarritzen, bainan salbamenduaren misterioan. Paulok bataioa hain du barnatzen nun ez zaukun errex haren segitzea. Kreatura berria aipatzen duelarik, bere buruaz mintzo da: Damaseko bidean gertatu zitzaionaren ondotik egiaz gizon berri zen. Bere lehengo biziari, lehengo ikus molde, egitate, sinesteeri hila zen : « Jesu Kristo baitan bataiatuak giren guziak, haren heriotzean gira bataiatuak izan...Harekin hilobiratuak izan gira… hil da, eta bekatuari zaio hil behin betiko… har gogoan bekatuarentzat hilak zireztela. »
Bataioa, Paulorentzat, bekatuaren hiltzea da : « Jakin behar duzue, gure arbasoak denak egon zirela hodeiaren gerizan eta denek iragan zutela Itsas Gorria. Denak bataiatuak izan ziren hodeian eta itsasoan, Moisekin bat eginez. » (1 Ko 10,1-2) Izrael Herriaren gertakari sortzaileak dira hauek: Jainkoak bere Herria esklabotasunetik libratzen du eta bizi berri batera sortzen, urak zeiharkatuz. Hori du Paulok Izraelen bataioa deitzen. Moisek esklabotasunaren kateak hautsi ditu eta itsasoaren zeiharkatzeak hauste hori du ospatu. Jesusek bertze hauste bat egin du. Gizona Jainkoaren kontra zagon, bere duda, ustekeria, bere bekatuan preso.
Jesus, alta, « apaldu da, hiltzeraino obedituz, gurutzean hiltzeraino » (Flp 2,8); Jainkoari doakion konfiantxak (obeditzeak), bere Aitarekin daukan gozotasunak, gizadiaren bekatuaren loturak hausten ditu : « Hil da, eta bekatuari zaio hil behin betiko; bizi da, eta Jainkoarentzat da bizi. » Jesusen ondotik direneri erraiten diote: « Berdin zuek ere: har gogoan bekatuarentzat hilak zireztela, bainan Jainkoarentzat bizi Jesu Kristo baitan. » Erranen du ere bataiatua dena « kreatura berri » dela : « Beraz, norbait Kristorena bada kreatura berri da; zaharrarenak egin du, berria sortu da. Hau guzia Jainkoarenganik dator, Kristoren bitartez berekin baketu gaitu » (2 Ko 5,17-18) Aldakuntza hori egina da eta ber denboran egitekoa: gure bizia bataioarekin berritua da; gure egun guzietako egintzak berritzea guri da.
Girixtino bizia ez da beraz errextasun bizia : «Berdin zuek ere: har gogoan bekatuarentzat hilak zireztela, bainan Jainkoarentzat bizi Jesu Kristo baitan ». Salbamenduan sartzea, errex da: sinestea aski, bainan horrek berea dakar : bide berri bat hartu behar baitugu, Kristoren Izpirituaren araberakoa.
Efesako jendeeri idatzi epixtolak errepikatzen du: « Zuen lehengo bizi moldeari uko egin eta jite zaharra, gutizia tzar lilluragarriz usteldua, erantzi behar duzue; eta bestetik, zuen gogo-bihotzak berritu eta jite berria, Jainkoaren irudirat kreatua jantzi behar duzue, Jesusen egiaren arabera zuzen eta sainduki bizitzeko. » (Ef 4, 22-24) Osoki berritzeko, sekretu bat bada: Kristoren gurutzeari so egon, obeditzearen etsenpluak baitu indarkeriaren gatea hausten: « Nerekin bat egon zaitezte ni zuekin bezala! Adarrak, mahatsondoarekin bat egoiten ez bada, fruiturik eman ez dezakeen bezala, zuek ere berdin, nerekin bat egoiten ez bazirezte. » (Jn 15,4)